هو= البيه الضاكتور
هي= الست الضاكتورة
*******
هو: انا النهاردة ياحبيبتي كتبتلك على خروج معايا وهناخد سوا جرعة الغدا اليومية اتفضلي ادخلي
هي: ميرسي.. استنى افتح ايدك
هو: ايه اللي بترشّيه ده.. بِرفيوم؟
هي: لا.. ده مطهّر للايدين عشان انت مسكت الباب
هو: ده بقى من انظف واطهر المطاعم.. المكان هنا معقّم جدا وهيعجبك.. لحظة قبل ما تقعدي اتاكد ان الكرسي مفيهوش اي فضلات ملوثة.. المرّة دي يحرك الكرسي برجليه مش كل شوية.. هترشّله مطهر على ايده.. اتفضلي استريحي.. جرثوم.. ينادي على النادل.. ها ياستي تحبي الغذاء إيه؟
هي: اللي توصفه ياحبيبي
هو: طيّب.. من فضلك تجيبلنا 30 جرام لحمة مشوية كلوريد الصوديوم قليل.. وطبقين شوربة فراخ ياريت الميّة اللي هتتعمل فيها تكون بنسبة 5% محلول ملح.. وطبقين خضار سوتيه.. ويفضل يتسلق الخضار في ميه مقطره. استنى انا معايا 14 كيس أهُم.. خدهم.. والحلو يكون 50 سم عصير برتقال للدكتورة وانا تجيبلي شاي وتحلّيه بتركيز 25% جلوكوز
هي: ممكن اخد عصير موز باللبن؟
هو: لا يا حبيبتي كده الصنفين مع بعض هيتفاعلوا ويضرّوكي.. ده أحسن عشان يقوّي مناعتك.. مش هوصيك بقى الاطباق تكون معقمة في فرن على درجه 600 درجة سيليزيوس.. ويفضّل لو الشوك والمعالق تكون بلاستيك استعمال مره واحدة فقط
الجرسون: تأمر بأي حاجة تانيه ياافندم؟
هو: لا متشكر جدا بس ياريت تجبلنا الغدا كمان ساعه و16 دقيقة.. عشان العملية الايضيّة بتاعة جسمنا متتلخبطش.. هايا ست الدكتورة ايه رأيك؟
هي: حاسة اني بقيت احسن دلوقتي
*******
هو: يا ستي انا جايبلك هدية ونفسي اشوفها عليكي
هي: معقولة ياحبيبي.. ربنا يديك الصحة يارب.. انا كمان كنت حاسة وجبتلك هدية انا كمان
هو: ياسلام وعرفتي ازاي؟
هي: إحساس بنفس الأعراض وبعدين متنساش ان المؤمن كيس قطن
هو: ورّيني الهدية بتاعتك الاول
هي: اتفضل ياسيدي بالشفا ان شاء الله
هو: ياه.. وتاعبه نفسك ولفّاها في صورة اشعة.. انتي عارفه اني بحب اللون ده
هي: افتحها الاول
هو: إزازة دوا بشريطه حمرااا؟؟
هي: دي إزازة فاتح شهية.. ومفاجأة فيها فيتامينات وحديد كمان.. هتلاقي معاد الجرعة كتبهولك على الشريطة الحمرا
هو: طيّب ياستي.. ربنا ما يدخل المرض جسمك ابدا.. شوفي بقى هديتي وياريت تخليني ألبّسهالك
هي: ايه ده؟ مش ممكن مش مصدقة عيني.. علبة جوانتيات كل صوبع لون؟
هو: هاتي ايدك ألبّسهالك
هي: طيب اروح دقيقة التواليت اصلح كريم الحساسية واجيلك
هو: اوكي ياحبيبتي.. بس اتاكدي ان البشرة شربته
*******
بعد 10 دقايق
هو: هاتي بقي أشوف المقاس مظبوط.. مال إيدِك بترتعش كده ليه؟ انتي لازم تعملي تحليل هيمجلوبين.. اكيد عندك انيميا
هي: عملته طلع كويس.. هروح اعمل تحليل غدّة بكره ان شاء الله عشان اطمّن.. وانت مال وشك بهتان شوية النهاردة وعينك صفرا
هو: فعلا انا حاسس بشوية ارهاق.. متشغليش بالك
هي: اوبس معلش حصل خير
كوز الميه اللي على التربيزه اتكب وبسرعة تمد اديها في شنطتها وتطلع كيس
هو: ولا يهمك امسحه بحتة الشاش دي.. أكثر فاعلية من المناديل
هي: شوفت الشريط الجديد اللي نزل السوق؟
هو: مش ممكن.. جميل جدا وبوستر الاعلان بتاعه فكرته جديدة وتشدّ
هي: ايوة.. ولاّ الحبّاية بتاعته.. مغلفة عشان تحمي جدار المعدة.. انا جبتلك عيّنة تجرّبه وتقولي رأيك
هو: اوكي.. هبلعه بشوية ميّه ونشوف
هي: يلا عشان تلحق النبطشيّة
هو: طيّب.. الاسعاف مستنياكي بره هتوصلك للبيت
جرثوم -
روشتة الحساب من فضلك

*******