السلام عليكم ورحمة الله وبركاته
اليوم ناقل لكم مقال بس خطير خطير اوي وراح يعجبكم برضه اوي اوي

خلصنا من وزير التجارة واللي علمنا وشلون نأكل وشلون نشرب ،، وجينا على الحبيب السياري اللي يقول مافيه ذاك التأثير على عملتنا من الشيخ الدولار وراح تستقر الأمور بسنة 2008 م ،، ومن جرف لدحديره وياقلب لا تحزن ،، ومرينا على القرارات الكفيله بكبح جماح الأسعار والرقابة والمتابعه مع النسبة 5 % وحماية المستهلك اللي من يوم أعلنوها والأسعار تزيد وما تنقص ،، وتجارنا ماقصروا حتى الفول زادوه ،، وأستبشرنا خير بمجلس الشورى يوم أنه أستدعى الجماعه علشان يشوفون حل ،، وليتهم ماأجتمعوا .


والنتيجة تصريح وزير وقفت عنده كثير وما قدرت أعلق عليه .


يقول سعادة الوزير : إنه لا توجد حلول سحريه لمشكلة التضخم وأن الدولة قامت بجهود للحد من مشكلة التضخم ومن أهمها زيادة الرواتب ودعم السلع للتخفيف من أرتفاع معدلات التضخم على الحياة المعيشيه للمواطنين ،،، ماشاء الله عليك ،، عيني عليك بارده ،، أنت تضحك علينا ولا على نفسك ياوزيرنا ؟؟ دعني أسألك سؤال من مواطن لمسئول .


من طالبك بحلول سحريه ،، نحن لا نتعامل بأمور السحر والدجل والشعوذه كمواطنين وإنما نطالب بحلول أبداعيه خلاقه ،، نطالب بحلول تنبع من عمق أدارة الأزمات والغير شبيهه بعمق الوزير المبجل التويجري الجالبه للأزمات ،، نطالب بحلول من باب مسؤوليتكم وألتزامكم كوزير للماليه ،، نطالبك بمتابعه حقيقية وعقوبة للمتجاوزين أيا كانت مكانتهم ،، نطالبك بالضرب بيد من حديد على كل تاجر ومستهتر جشع بالتعاون مع أخوانك الوزراء وطرح المشاكل بكل مصداقية وشفافية تحت يد ولي الأمر.


ثم هل تعتقد بأن 5 % كافيه لمواجهة القصف أرض أرض للأسعار دون حسيب ولا رقيب ؟؟ ،، أن قلت نعم فأنصحك بالأستقاله ،، لأن 5 % لا تحل حتى 5 % من المشكله القائمه .


وإن كان عذرك بأن أحد الحلول هو زيادة الرواتب فمابالك بالفئات الأخرى ممن يعملون بالشركات الخاصه والعاطلين والأرامل والمساكين وغيرهم ،، كيف تساهم 5 % في حل مشكلتهم وهم غير مستفيدين منها ؟؟.


وأما دعم التجار أسف أقصد دعم السلع فأتساءل لما لم يتم طرح بيان يتضمن كم كان الدعم السابق وماأصبح عليه الأن ؟؟ وماهو المشمول تحت هذا البند لأنه وكما كل التصاريح كلامكم غامض وعام ولا يوضح مصداقية ماتدلون به من خلال تصريحكم ،، وأبشرك ياوزير إن كنت لا تعلم مايدور في الشارع ،، فأنا أقولك ،، الأسعار في تزايد كل لحظة والمجتمع ككل معرض لمشاكل أجتماعيه وأمنيه وصحيه وغيرها كنتائج حتميه لأزمات الحاليه .


أما حكاية التضخم فأكيد أنك تعلم أن نسبة التضخم وصلت في ديسمبر 2007 م إلى 6.5 % وهو أعلى رقم منذ 16 سنه ،ن فياريت تفيدنا بالأسباب والمسببات ولما لم تتخذ الحلول الممكنه بدون أرضاء للبعض على حساب هذا الوطن وأهله ،، ولا تقولي فك الأرتباط سلبي جدا ،، أعتقد فيه دول فكت أرتباطها ولازالوا عايشين ويتقدمون للأمام ماهو مثلنا للوراء ،، ولكن ياريت هالمره بشفافيه وبوضوح وببيانات ومعلومات موثقه ،، أسف أنا قلت شفافيه أنسى الموضوع أحسن .


أما السالفه الكبرى والتي صرحت بها بخصوص صندوق التنميه العقاري وتأكيدك بقولك ( نحن نعلم أنه لا يكفي ( المقصود القرض العقاري ) ولكن على صاحب المسكن إيجاد طرق مناسبه لإتمام سكنه ) .


ودعني أقف هنا وأسألك : ما المقصود بأنكم تعلمون بأن القرض لا يكفي ؟؟ ،، أن
هل يعني هذا أن لا زياده في القروض في المستقبل القريب ،، تكون كارثه لو صدق كلامك ،، فالأيجارات والأراضي في أرتفاع دائم والمواد كذلك ،، وأتساءل هل هي جرأه أن تقول بأنكم تعلمون ولكن دبروا حالكم ماعندنا لكم سنع ؟؟ الحقيقة أنها ماهي مقبوله منك ياسعادة الوزير والمفترض أنك تحاسب على هذا الكلام الكبير ياكبير .
أما مسألة إيجاد طرق مناسبه لإتمام سكنه ،، فياريت توضح لنا هذه المقولة المتفرده في خطورتها ،، وماهي الطرق المناسبه من وجهة نظر سعادة الوزير ؟؟ وهل تعلم بأنك توجه دعوة صريحة لضعاف النفوس للفساد بدلا من مكافحة الفساد وتقطع الأمل بإتخاذ إجراءات كفيله بمعالجة الوضع وتوجه توجيه غير سليم وحكيم لمشكلة خطيره .
وماهي الطرق المناسبة في نظرك ؟؟ هل هي قبول الرشاوي أو الشحاذه عند المساجد وفي الطرقات أم النصب والأحتيال أو من تحت لتحت ومشيلي أمشيلك أم أن يسرق من تقصده بكلامك ،، ياسعادة الوزير أذا المواطن ماهو قادر يسد احتياجاته والتزاماته في ظل ارتفاع الأسعار فكيف تطالبه بطرق أخرى ،، أتمنى أمنيه أعرف وشهي الطرق المناسبه اللي راح تنشىء بيت بمئات الألوف أذا ماقلنا على أضعف تقدير أن الأرض تكلف 300000 ريال وإنشاء مسكن كأدنى تقدير الأن وفي ظل هذه الأرتفاعات يكلف 750000 ريال أي المواطن يحتاج فوق القرض 450000 ريال هذا أذا قدر يشتري أرض من مدخرات عمر كامل أو بالدين ،، والسؤال اللي يعيد نفسه : وشهي الطرق اللي تجيب 450000 ريال ،، ولا ننسى أن القرض لا يأتي ألا بعد سنين طويله ،، أي أن 450000 ريال ستصبح حينها ربما الضعف أو أكثر أذا هذي سياستكم .
وأخر سؤال بسئلك أياه إن ياوزيرنا الكريم ،، ممكن توضح لنا من هم ذوي الدخل المحدود ؟؟ وكم نسبتهم ؟؟ وأذا تبي تعرف الجواب تعال لأي موظف بنصف الشهر وأطلب سلف منه وراح تعرف ،، لا تغرك الرزه ،، الشعب يتكاتف والدين أصبح من ضروريات الحياة عند الغالبيه ،، لكنه مجتمع متكاتف بينه وبين بعضه علشان يمشي المركب ،، لا تلومهم ياسعادة الوزير ،، يوم أنهم شافوا أن وزارئهم مثل زميلك سعادة وزير التجارة وطبعا سعادتك ،، قالوا السلف أهون والشكوى لغير الله مذله .
ياسعادة الوزير ،، مانعيشه اليوم هو فشل في أدائكم ياوزراء للمهام المنوطه بكم بأمانة ،، كما أنه فشل في قولكم للحق لولي الأمر والسعي لما فيه خير له ولأبناء هذا الوطن ،، ياسعادة الوزير إجاباتك وتصريحك تفتقد للمصداقية والوضوح ،، ياسعادة الوزير نرفض تصريحك ونطالبك بأداء الأمانة وحلول واقعيه وماهو تصاريح بأبتسامه صفرا،، نطالبكم بقول الحق في وسائل الأعلام وطرح المشكله وطلب المشاركة بالحل من قبل الجميع وماهو سوالف بمجلس الشورى للتخدير العقلي والفكري ،، ياسعادة الوزير نطالبك بسياسة أقتصادية تجلب الخير لهذا الوطن وأهله (( جميعا )) ،، ياسعادة الوزير نطالبك بإصلاحات شامله للخير وبالخير.
يبه أبو متعب ،، وزرائك بعيدون عن تطلعات الشعب والمواطنين ،، وزرائك يصرحون بكلام خطير ويفاقم المشكلة والواجب محاسبتهم عليها وحثهم لراحة المواطن ماهو أهانته وتحريضه لطرق أخرى وتغيير نمط معيشته اللي تعود عليها من سنين طويله .


سامحوني أن أخذت من وقتكم بس سعادة الوزير ما أقدر أوصله ،، وأذا وصلت له ماأقدر أقول اللي في قلبي له لأني مواطن ،، والمواطن له حدود ،، والمشكله أن فكري داخل جمجمتي وحتى فكري مثل سعادة الوزير ماني قادر أوصله وأوقفه عن التفكير وإيقاف حثه وتحريضه للأصابع أن تكتب اللي بالخاطر المكسور .








أنقل لكم الأبيات التي لا أخفي إعجابي بها ودوما أراها أمامي في مرآة عقلي وأحزن إن رأيتها على أرض الواقع


كذوب اللي يقول بها الزمن خلك من الأخيـار


كذوب اللي يصدقها.. مغفّل شخـص يسمعهـا


كذوب اللي يقول ان الزمن اقوى من الاسـوار


اذا ما طاعـت الايـام نـزّل هامتـك طعهـا


كذوب اللي يقول ان المبادي تنقـذ الاحـرار


كذوب اللي يجي يمدح بضاعه امـس بايعهـا


كذوب اللي يقول الصمت نعمه..والزمن ثرثار


تسير القافله معهـا.. تمـوت القافلـه معهـا


كذوب اللي يقول السيف اماني.. والجواد اعذار


مغفل من يشوف الناس من خـارج طبايعهـا


مظلل من يقول البرد يرحل في وجـود النـار


مزوّر عاشـق الحكمـه اذا ماصـار يتبعهـا


كذوب اللي يعلق لك علـى شماعـة الأقدار


جميع أغلاط هالدنيا ويطلـب منـك ترفعهـا


كذوب اللي يقول المشكلـه تنحـل بالاشعـار


يجي يمدح لك الزهره ولا من غبـت يقلعهـا


مظلل كل من يركض ولا يخرج عن المضمار


كذوب من روى الاحداث لا غيـر مواقعهـا


مخادع من يقول إصبر لما تكشف لك الأسرار


حقايق إقطع الهرجه وقلله,,ويـن مطلعهـا؟!!



كذوووب..وتاقف الكلمه بحلقي والحروف كبار



اطيع الكلمه / الزلزال..حشى مانيب طايعها !!

يعطيك العافيه علي موضوع القيم والاكثر من راائع

تقبلو مروري

اخوي الافضل تشكراتي لك ويا هلا