المهم اخر ماوصلنا ذا البدويه تنادي تقوول ...
وما امدااني امشي الا واسمعها تناديني ياورع ياورع علامك مووقف سيارتك هنيّا وانا جايه ابوقف بمحل موترك .. وابفتح خشتي ارد عليها الا هي تقول انت رجالن تبي تصلح الموتر ولا اشتكيك عند المرور .. واطير عيووني فيها من اللخمه واتذكر قانون ... الخ وأقول ابشري باللي يصلح موترتس وأكتب ورقه فيها رقم بطااقتي ورقم جوال امي واقول لها لا صلحتي موترتس ازهمي وانا اعطيتس قيمته .. وأمد الورقه لها الا هالسكيورتيه طامرين عليّ من كل جهه ويقولون صدنااه صدنااه .. يرقم يرقم شهر سجن وغرامه هههههههههههههههههههههه
...وانا اقول يا عالم وش ترقيمه بس تعوذوا من ابليس .. هذا اللي الناقص أنا أرقم ذي <<= أحس أني جرحت أنوثتها وأصبتها في الصميم خخخ .. الا وهي اللي تهد فيني وجعن يووجعك ويخلخل عظاامك يا قليل الأدب إيه يا حضرة الضابط ( آبوو من علمتس وش الضابط ) تراه مرقمني .. ويتشاقلووني لمكتب العمييد وتلفّقت القصة على أني ملاحق البدويه من الدايري وملبّقن موتري في موترها بالمواقف وبعدين رقمتها .. ويوم بغى الضباط قصدي السكيورتيه انهم ينصحوني أعتديت عليهم وقعدت اسبهم واسب الكلية والعميد ( مدري وش دخل امه اسبه ) ويلخوني عقبها بإنذار وتوقيف عن الكليه اسبوع وفوق هذا الزموني اصلح موتر بدوية الشياطين .. وعلى حجز الناصريه اسبوع كامل .. وفعلاً قضيت اسبوع ولا أروع في التوقيف قابلت خلااله مجموعه من الشباب لا بأس بها ممن لم يستوعبوا القوانين الجديده .. المهم بعد ما خلص هالأسبوع مرني واحدن من الشباب الله يذكره بالخير وطلعني من التوقيف وهو جالس يهدي فيني ( صاير كأني قدر ضغط من زود الغبنة ) ايه وييقول لي ولا يهمك اليوم عشاك علي <<= خخخ بزعمه أنه جاي من أقصاه هالحين .. ونحرك والله لأحد هالمطاعم .. طبعاً ملتزمين بقواعد المرور وماسكين السيد الأيمن وماشين بشويش والطريق فاضي وفيه موتر يبارينا بالسيد الأيسر .. ما درينا الا هو حاااذف علينا بكل قووته .. فما كان من خويي حزتها الا انه يلف يمين زوود يبي يبعد عن الموتر .. إلا ونقشع في الزبالة المعترضه بالشارع .. وياقلب لا تحزن انوااع المواوييل العرااقيه من هالقشعه .. وتنزل من السيااره بنيّه وش حليلها متحمسه تقول الحمد لله ما صار شيء ( لعنبوها ياهي جررح ههههههههه ) .. من شفتها مقبلة لمّنا وانا اضحك لها ههههههه( بزعمي ابيها ترحمنا ) وهي اللي تعقبنا وتروح لم قطوه في وسط الشارع تقول لها الحمد لله اني ما صدمتك يا بوسي المره الثانيه انتبهي وانتي تقطعين الشارع .. وتشيلها وتحطها على الرصيف الثاني وتركب سيارتها وتمشي .. ولا كأن فييه أروااح بغت ترووح ملح والسبّه هالبووسي .. وجلسنا ربع ساعه انا وخويي ننظف انفسنا من هالزباله ونمسح هالجروح اللي فينا على جية راعي كابرس ولد حلال شالنا لأقرب مستشفى ومن الوجع نسينا الأكل .. ويوم ظهرنا من المستشفى حطني خويي في البيت وانحن حالتنا لو يشوفها اللي سمح للحريم بالسواقه ان كاان يطعن نفسه من تأنيب الضمير ( أما هاللي سمح للحريم بالسواقه مثل اللي يشجع على السياحه الداخليه ويتسيح برا خخخخ ) .. ويوم جت الساعه 12 بالليل الا والجوع بادي يلعب فيني وش السواه ياولد مالك الا الددسن تظهر به دام ان العجوز نايمه ولا عندها عرسن الليله ولاااش .. وآخذ المفتاح واطمر للتخصصي ابي اتعشى في حدى هالمطاعم وأسترجع أيام من عمري مضت .. وأنا مقبل على شارع التخصصي الا ذاك التفتيش وهالعالم صافين سرواات عنده والتفت وإلا على يساري بنيّة طااقتن اللثمه ومعها هوندا ويسئلها الضابط رخصتك يا قمر .. قالت وربي آسفه بس ناسيتها .. رد عليها والإبتسامه شااقتن وجهه عادي تصير كثير .. طيب الإستماره يا عيووني .. قالت له يوووه بعد آسفه بس هذي سيارة أبوي وشكله مآخذ الإستماره ( يللعن ام النصبه .. ابوو وسيارته هوندا ) رد عليها هههههه هالأبوان عليهم حركاات مالها داعي.. قال طيب يا ام احلى عيون شفتها معك أي اثبات للشخصيه .. قالت تصدق ( بنعوومه وتغنج ) رد وهو رايحن خرخر أصدق وننص بعد ولو تبين اتسذب نفسي بعد .. قالت ابوي تووه مارضي يطلع لي اثبات هالمتخلف .. رد عليها عاد هذا ابووك غصب تتحملينه .. صراحه كان ودي لقانا يطول اكثر بس اخاف اني معطلتس ولااش .. قالت ايه والله اني مواعده صاحباتي بنتعشى مع بعض واخاف اني تأخرت عليهم .. قال ياليت بعد ما تتعشين تمرين وتقولين لي هااي نواف ( نعنبوووه اسمه مكتوب على بدلته ظافر ويقول نواف ) هههههههههههههههههههه ردت عليه بضحكه تذوّب الثلج اللي بالقطب المتجمد كله .. وقالت أبحاول ان شاء الله بس ما اضمن لك .. وحطته بالدي وراحت وهالسلقه قلب رشدي أباظه وهو قاعد يشّر لها بيده يقول مع السلامه .. حزّتها جاني الدور ومزهب الإستماره والرخصه والبطاقه مازهبتها ( نسيتوا سالفة المحطه ) وقلت تفضل طال عمرك وهو موب يمّي كان يحاتسي خويه .. والله وانقهر واعلّق ام البوري خخخخ حسيت أني قوي عقب هالحركه .. ويرتاع أخونا في الله ويلتفت علي ّ وهو معصب نعم خير وش فيك ما تحترم نفسك .. وانا اعتذر له واعطيه اوراقي .. ويآخذها ويقول صف على جنب .. خير وش فيه يابو الشباب .. قال صفّ واعلمك وشو الخير .. المهم صفيت على جنب وبعد مالطعني حول الساعه جاني وقال انت ما تدري ان دخول التخصصي ممنوع على الشباب ولا انت ما تقرى جرايد ولا تتابع اخبار .. قلت الا طال عمرك بس القرار يقول ممنوع بعد الساعه 12 وانحن الحين الساعه 2 ونص .. خخخخ حسيت أني لخمته وتلعثم بالحتسي ويقول طيب انا وش اللي يضمن لي انك منتب تدور من بعدالساعه 12.. اكتشفت ان الشرح للقايش اللي هو لاابسه اصرف من الشرح له .. وبعد نص ساعه وانا اقنع فيه هداه الله وقرر يسمح لي اني امشي بس مافيه دخوول للتخصصي ( السلطه اذا أعطيت غير اهلها غبيينه ) ..
وتنسد نفسي عن كلش وارجع للبيت وانا أغني يالله يابطني سرينا .. ضاقت الشوارع علينا .. وانا واقف عند حدا هالإشارات ولا ذاك اللكزس اللي تسوقه ذيك الشليييخه ( أحيييه بس ) واتعوذ من ابليس واصد عنها .. ما دريت الا وتفتح دريشتها وتأشر لي بيدها تبي تكلمني .. ويقول لي عقلي لا ترد عليها وقلبي يقول رد عليها من زين عقلك تطاوعه .. وانزل دريشتي وقلت لها آمري أختي اي خدمه قالت لي ياهووه الى الآن وانت مسوي ثقل .. قلت عفواً تعرفيني انتي ؟ ( خخخ منيب عاقل ياتوم كروز ) قالت نسيت يومك انت وخويك في شارع العليا معكم جمس وتلاحقون اللكزس اللي انا راكبتها ومسوين زحمه وموكب علينا وانواع المحاارش .. وأستطردت ( ويقولون بعد منيب أعرف احتسي ) في كلاامها .. بصراحه انت معجبني من حزتها .. وتطلع كرت من شنطتها وتلحسه وترش عليه طيب ( كأنها من الزيود اللي بشارع السويلم ) .. إلا مير ما تلاحظوون أني طولتها شوي وأنا أنصّب عليكم عند هالإشاره ؟ ما علينا المهم أن بليسي حزتها لعب في راسي وهو يقول مرتين وانت ماشي في حالك وآخرتها مآكلن تبن .. هالمره هي الثالثه والله العالم انها ثابته ما عليك خذ الكرت بس وتوكل على الله .. وأقتنع بكلامه وأمد يدي أباخذ الكرت منها إلا وعيووني ما تشوف الا النور 3 دوريات وصالونين وجيب حرس ( داري بتقولون وش سنع الحرس .. لان الشعب مايعرف الحرس الا بالجنادريه بس ) ونزلوا كلهم علي ولا أحد فكر يكلمها .. ويمردغووني الين عضّيت الطّاره من الوجع .. عقبها راح واحدن منهم يسألها صح هو ضايقك وتعرض لك وحاول يعتدي عليك صح صح .. ولا يهمك لا تنفعلين بنوريك شغل الله فيه .. واسمع واحد من مطاوعة الحرس يصارخ يا مجرم يا زنديق ..أتريد أن تشيع الفاحشه في ديار المسلمين ( طيب دامكم ما تبونها تشيع وشوله تخلونهم يسوقون اصلن ) وأنا بصراحه تقبلت الأمر بروح رياضيه وطفيت الموتر وفتحت لهم الباب .. يعني كملوا مردغتكم فيني .. والبنيّه للأمانه ترى ما ردت عليهم ولا قالت لا إيه ولا لا .. سفهتمهم وراحت .. أما أنا فتم إيداعي في الحاير للتهم الآتيه :
أولا : التعرض لفتاه بريئه ومسالمه في الطريق وبمنتصف الليل .
ثانياً : تعطيل حركة المرور .
ثالثاً : مقاومة رجال الأمن وإطلاق النار عليهم ( لاعبتن بعقلي أخبار هاليومين )
الحكم : السجن لمدة شهرين في الحاير وغرامه 50 الف .
وتم تنفيذ الحكم علي ..ّ وأبشركم توني طالع من السجن أمس ..
وختاماً .. ما أقول إلا ( ياما في السجن مظاليم .. وهيك ياما هيك وقسسمن مش لايئه علييك )
ههههههههههههههههههههههه
ومع الف سلامه ياحبايبي ...