بقول لكم قصه صايره لي وأنا بثالث متوسط...
مره رحنا لديرة أخوالي..
وعزمتنا خالتي على الغداء..
وتغدينا عندهم ..
وإلى هنا والوضع عادي..
وبعد العصر..
رجعت أمي لبيت جدي.. وبعد وسايط وعطني وأعطيك من الحتسي أقصد الهواش أنا وأمي..
وافقت أجلس عند خالتي وبناتها..
المشكله..
أن عندهم زواج بيحضرونه وأنا مالي والزواجات لا معي لبس ولا غيره..
المهم..
خالتي راحت للزواج وبنتها اللي كبري تحاول تقنعني أروح معها..
وأنا مو راضيه<<أتغلى ما أدري عناد ما أدري وش هو..
وهي ودها بالروحه.. أحسب عندها فدائيه بتجلس معي.
لكن الله يجزاها خير طلعت قبل أمها <<وييييييييين التلزيم؟؟!!
يالله مافيه مشكله..
قلت بقعد مع باقي أخواتها ..
و أنا داريه أن الزواج ببيت مهوب بعيد عن بيتهم..
وأنا اللي أسمع أصوات الطقاقات من بعيد
ماش تسني بديت أغير رايي ودي أروح ...
المشكله مهوب أني أخاف أطلع لحالي بالليل..
المشكله لودرت أمي والله تذبحني
وإلا عادي أتسبع عباتي وأعنفص=أدرعم
مع هالشوارع ولو هي ظلما..
بطله عند عمري ما أخاف وخرو عن طريقي أنتم بس ..
هو إلى الآن مافيه لبس بس عادي بروح..<<أقوى وحده بالعالم أنتي..
الله يذكرني بالخير آآآآآآآآآآآخر شي أفكربه شكلي..
اللبس..
المكياج..
والتسريحه..
والنعال..
كله مافيه..
أهم شي ودي أطلع..
كل هذي مهيب عوائق قدامي.. خلاص قررت بحضر بحضر..الله لايعوق بشر..
و أنا اللي أتلفت يمين ويسار لايشوفني بس أحد من أهل البيت اللي جالسين ويثنييني عن رااااايي..
و أتسبع عباتي وأطلع مع باب الشارع وأعنفص=أدرعم
ما أدل البيت بس أني أتتبع أصوات الطقاقات وإذا وقف الصوت وقفت وإذا طلع كملت..
إلين وصلت للمكان المطلوب..
وتعرفون عرس يعني..
صح أنه ببيت بس البيت كبير..
والناس كثار..
وكل جايب جهده بالتزين
وأنا اللي توي أفطن لعمري..
يابنت نزلي راسك وشوفي وش عليك؟؟!!
ياربيه وش أسوي ؟؟!!
لابسه شيال جنز كحلي وقميص أبيض مقلم برمادي.. والنعال شحاطات سود ما أرتاح بطلعاتي إلا بهن..
كل هذا قلت مايخالف..
من بيناظر رجليني..
أومن اللي بيلتفت للبسي مع الزحمه..
بس عاد شعري هنا تكمن المشكله
وين أوديه ؟!
خشن تقل أسيام ومنتفش حتى بالخيال مايجي!!
.. وجديله..
والعالم تسريحات ودنيا ..
وكل يناظر وجهي
إلا عاد الوجه الحمدلله على النعمه..نخليه ماله حل نسيت أصلا إن عندي وجه ..أقصد تناسيت..

العالم..
يقولون شكلها مضيعه بالمكان ..جايه بالغلط ..
حسيت من نظراتهم أني كااااااااائن غريب من كوكب ثاني..
عاد جتني فكره جوهنميه..؟؟؟؟؟
ألا وهي.. أن أقوم بفك الجديله..
وفكيتها.. وتخبرون ..شعر وخشن.. ومجدول.. يعني وش بيطلع<<ياليييييييل والله شيء..
وأنا أول مره أفك شعري بمكان عام..ماتفارقه الجديله بالعاده...إن تطورت ذاك اليوم حطيت بدل الجديله جديلتين وحده فوق ووحده تحت..<<لا تكفين خلينا على الجديله..
المهم...
جاني شعور أني أطير..
كأني وش التسريحه اللي أنا مسويتها..
علما بأني.. ماشفت شكلي..
وإذا بالنظرات تتكاثر علي بعد فك الجديله..
قلت أنا دايم أسيء الظن بمن حولي خلنا نحسن الظن هالمره بهم<<مالقيتي غيرها..
شكلي معجبتهم<< والله الثقه ..
أهم شي عندي بذيك الساعه.. أني شفت الرقص..
والأهم والأهم.. أن بنت خالتي تشوفني..
وأحط عيني بعينها..
تراي جيت..<<فرحانه..

بس هي ماعندها وفاء ..
بعد ما تأكدت أنه أنا.. ولا كأنها تعرفني..
تقول تفشلين وش جايبتس؟؟؟!!!
وجحدتني..<<رحمت روحي
وقعدت لحالي بزاويه..أشوف اللي يرقصون..<<قمة المتعه عندي..
إلى أن أنتهى العرس..
وشفت خالتي وبنتها بيطلعون وطلعت معهم..
ولا كأني مسويه شيء.. وكأني رايحه معهم..
خالتي ماهيب حاتسيه تخاف تقول أمي قعدتها عندك وهملتيها.وبس..
أهم شي من القصه إذا صار بخاطرك شي مهما كان اللي بيواجهك سوه..

أهم شي من القصه إذا صار بخاطرك شي مهما كان اللي بيواجهك سوه..


في ذي انا اشهد

الواحد يعيش مره وحده بحياته

مشكوره حبيبتي على قصتك الحلوه كعادتك ياقلبي

ام لمار

مشكوره أختي على المرور..
دمت بود.

الله يسعد أيامك أختي ستور..
مشكوره على المرور..
دمت بود.